目錄
🖊 本周重點
- 多間電子支付商在消費券啟用首日現錯誤
- 十項商界最期待的科技
- 自動駕駛汽車？不如自動駕駛貨車
🗞 News 1: 多間電子支付商在消費券啟用首日現錯誤
2021 年 8 月 1 日，除咗係 8 月嘅第一日之外~~（妖）~~，仲係 $5,000 電子消費券第一期派發嘅日子。大家經歷過電子排隊，飲咗幾加侖嘅咖啡，先至入到 App 申請一役，終於修成正果，可以享受下 Shopping 嘅快感啦，right？
Right？
消費卷派發首日，已經有唔少用戶遇到大大小小嘅問題。小則係凌晨時分無法登入各個平台查看自己嘅消費卷，大則：
- 有巴士公司要臨時關閉電子支付系統；
- 有用戶無法把消費券轉至同賬戶的不同卡上；
- 有用戶在商店付款後被告知交易失敗，但係在應用程式中卻被扣款。
ICT 重點
大學嘅時候，我成日同我嘅朋友笑言：It’s incidents like this that secure our future. 係，認識啲新嘅 technology 好重要，但係如果唔識點樣 apply 落去，就算你個 project 有幾 well-intentioned、有幾 ground-breaking，users 因為種種問題而唔用，都係嘥 9 氣。
讀 Elective D 嘅同學仔應該會知道，開發一個系統有唔少方法，其中一個方法叫做「瀑布模型 Waterfall Model」。根據瀑布模型，開發系統總共有六個步驟：
- 可行性研究 Feasibility Analysis
- 需求分析 Requirement Analysis
- 系統設計 System Design
- 系統實施及測試 System Implementation and Testing
- 系統轉換與維護 System Conversion and Maintenance
- 文件編製 Documentation
六個步驟，邊個最重要？
可能你會話：「梗係實施同測試最重要啦！寫錯咗個 App 扣錯人錢咪好大鑊囉！」其實實施同測試都唔係最重要——有料嘅 Programmers 一定會識得測試好先交貨。最重要嘅反而係第 2 步：需求分析。
因為呢到所講嘅「需求」嘅範圍十分廣泛。一般嚟講，需求分成三種：
- 商業需求 Business Requirements（BR）：姐係話站係公司嘅角度，系統要達成乜嘢目的。以消費券做例子，個商業需求就可能係：「提供一個付款平台，讓成年的香港市民能獲得五千元消費券，從而振興香港經濟。」
- 功能性需求 Functional Requirements （FR）：姐係話站係你即將開發嘅系統嘅角度，呢個 App 要提供乜嘢功能，先至滿足到前面講嘅商業需求。表達 FR 嘅方法有好多種，其中一種方法叫做「用戶故事 User Story」。其中一個 User Story 可能係：「作為一個香港市民，應用程式需要提供註冊頁面，好讓我能符合申領消費券的資格。」
- 非功能性需求 Non-functional Requirements （NFR）：姐係話除咗功能以外，呢個系統要達到啲乜嘢，否則會影響用戶體驗，從而影響 BR 嘅達成。例如，常見嘅 NFR 會包括：個系統要支援繁中、簡中、英文三種語言；系統嘅上線時間（up-time）要達到 99%等。
係派發消費卷呢件事上面，點解有用戶會遇到咁多問題？其中一個可能性，係因為做需求分析嘅時候 NFR 嘅分析不足，誤判咗硬件同軟件嘅需求，所以先會「大塞車」。
咁點解上次申請已經「大塞車」過一次，今次仲會有咁多「甩轆」事件？I don’t have an easy answer，但係呢個明顯唔係科技嘅問題；呢個係人嘅問題。呢啲事件關乎到管理層點睇，可能佢哋覺得 fulfill 到 FR 咪算，有咩事咪等 PR 搞掂就算；又或者佢哋嘅 IT 知識唔足以幫佢哋去避免「甩轆」。我淨係知道，
對一個 IT Project 而言，項目失敗嘅主因，係因為用戶拒絕接受呢個系統。用戶唔接受個系統，可能係因為系統無法滿足用戶嘅功能性及非功能性需求。
For an IT Project, the main reason for its failure, is the rejection of the system by the user. User rejects the system because it fails to fulfill their functional and non-functional requirements.
（嘩原來已經寫到咁長 🥴 仲等我諗住特登講下第 3 點、Idempotence 同 ACID 原則添 😂 Well maybe next time）
相關課題
- 選修單元 D 第 18 課：關於瀑布模型
- 選修單元 D 第 19 課：關於系統分析
新聞來源／詳細閱讀
🔖 News 2: 十項商界最期待的科技
CIO.com 訪問咗 IT 界嘅領袖同埋分析師，問佢哋邊啲科技會係 2021 年為商界帶來破壞性（disruptive）嘅改變。以下係佢哋揀出嚟嘅 10 個科技：
- 人工智能及機器學習
- 大數據及其分析
- 5G
- 區塊鏈
- 雲端應用及 SaaS
- 雲端基建
- 無人機
- 數碼助理
- 可穿戴設備
- 無伺服器計算
ICT 重點
ICT 嘅考試卷入面，間唔中會見到一啲比較新嘅科技，要考生講下佢哋嘅優缺點。我想揀其中幾個科技講下：
區塊鏈
區塊鏈透過「去中心化」嘅網絡系統同密碼學結合，組成一種儲存數據嘅方法。係一個區塊鏈入面會有唔同嘅區塊，每個區塊會儲低交易數據（transaction data）、時間戳記（timestamp）以及透過密學計算出嚟，屬於上一個區塊嘅雜湊值（hash）。由於每個區塊會記錄上一個區塊嘅 Hash，所以佢哋會 form 到一條鏈（有啲似 Linked List 嘅概念）。另外，由於每次計算 Hash 嘅時候會包含以前區塊嘅 Hash，所以 Blockchain 唔可以修改以前嘅 Data，因為改咗之後個 Hash 就會對唔上。
（呢到講嘅 Transaction 唔係指平時嘅現今交易；呢到嘅 Transaction 係指喺 Computer Science 上面一啲唔可以再分割嘅 Task，以呢啲 Task 只可以成功或者失敗。好多時 Transaction 會指我哋放啲數據落 Database 嘅動作。）
由於區塊鏈嘅去中心化，所有嘅交易都會變得開放、透明。呢一點都導致好多加密貨幣嘅出現。但係去中心化亦都帶來幾個問題，例如保安變得困難（因為你唔會知道其它設備嘅保安情況）。另外，由於以往嘅數據不可修改（immutable），呢點都會帶來私隱問題（例如將我嘅醜照 upload 上一個 blockchain 等我 del 唔到 😢 ）。
SaaS
SaaS 全名係「軟件即服務 Software as a Service」。以往，我哋想用某個軟件，例如 Word Processor 嘅話，就必須先俾錢買軟件嘅使用權，再將軟件安裝係電腦到，用嘅時候係本地電腦運行。SaaS 就完全唔同：軟件會係雲端嘅服務，要用呢個軟件嘅話，就只需要打開網絡瀏覧器 Web Browser，去佢個網就得。我哋最常用嘅 SaaS 應該係 Google 提供嘅 Google Drive、Google Doc 一類嘅應用程式。
用 SaaS 有唔少好處，例如：
- 免卻安裝軟件時所需嘅時間，尤其係喺大公司同時要安裝好多部電腦嘅時候；
- 免卻維護／更新軟件所需嘅時間，因為 SaaS 嘅提供者會自動更新並推送新版本；
- 當需要在更多台電腦上使用該軟件時，無需重新設置新電腦（只係要確保使用條款容許新的電腦加入）；
- 一般而言，SaaS 的租金會比傳統購入式軟件更具吸引力。
但係 SaaS 都有一定嘅壞處，例如：
- 由於數據儲存在雲端，我們難以確保數據安全；
- SaaS 令互聯網連接變為必須，公司的互聯網連接出現問題時則可能直接導致商業停頓；
- 如果公司係由傳統購入式應用程式轉至 SaaS，數據要由電腦遷移至雲端會帶來操作上及安全上的問題，尤其係涉及客戶嘅敏感資料個陣；
- 更換 SaaS 供應商也會十分麻煩（互操作性 Interoperability）。
可穿戴設備
最出名嘅可穿戴設備應該係 Apple Watch 啦。其它常見嘅可穿戴設備包括虛擬實境眼鏡（Virtual Reality headset）、NFC 戒指、Google Glass 一類嘅頭戴式顯示器 （Optical Head-mounted Display；OHMD）。
由於可穿戴設備需要可攜帶（Portable），設計可穿戴設備時必須留意設備嘅重量（太重點樣出街），同埋個設備嘅電池容量（用得一個鐘又點帶出街）。
相關課題
- 必修部分第 12 課：關於輸入輸出設備
- 必修部分第 18 課：關於互聯網的應用
新聞來源／詳細閱讀
- 2016 年 1B 卷第 3（a）題
- 2016 年 1B 卷第 5（a）題
- 10 technologies that will disrupt business in 2021
- Blockchain - Wikipedia
- The Role of Blockchain Technology in Ensuring Digital Transformation for Businesses: Advantages, Challenges and Application Steps
- Top Disadvantages of Blockchain Technology
- Top 5 Advantages of Software as a Service (SaaS)
- 軟件即服務 - Wikipedia
📱 News 3: 自動駕駛汽車？不如自動駕駛貨車
有一間初創公司叫做 Aurora 。呢間公司本身想做自動駕駛汽車，但係喺幾年前將公司嘅焦點改成自動駕駛貨車。呢個改變嘅背後至少有兩個原因：
- 自動駕駛貨車更有利可圖；疫情更令商界睇出物流業對經濟有幾重要；
- 自動駕駛貨車更容易開發；貨車只需要處理公路上較順暢嘅車流，而汽車則需要處理更多不確定因素，例如係行人，或者踩住風火輪嘅行人。（無錯，人類就係問題。）
自動駕駛貨車有望降低物流當中司機嘅費用：人類會負責短途、街道部分嘅駕駛，自動駕駛貨車則負責公路部分。另外，自動駕駛貨車亦有望減低貨車司機嘅意外死亡率。但係，現時自動駕駛貨車仍然處於試驗階段，離普及仲有一段距離。（哈，距離。）
ICT 重點
人工智能嘅一大難題，就係訓練用嘅數據點樣嚟。數據嘅質素同容量，會直接影響到 AI 嘅效率。人工智能同商界比其它科技更加密不可分，所以人工智能嘅開發更加睇重佢嘅利潤。同學要多諗下，一啲傳統嘅行業加入新科技的話，會對間公司同入面嘅員工有乜嘢影響。
相關課題
- N/A
新聞來源／詳細閱讀
- 2020 年 1B 卷第 4（d）題
- Trucks Move Past Cars on the Road to Autonomy
問題回顧
睇下你仲記唔記得呢篇文章嘅內容！
- IT Project 失敗嘅主因係乜嘢？
- SaaS 有乜嘢好壞處？（記得要係 Comparative Advantage！）
- 自動駕駛貨車對運輸業有乜嘢影響？
鐘意篇文嘅話，麻煩係下面個 IG Post 上面俾個 Like ❤️ 感謝感謝