ICT 每周速報(Week 37, 2021)

Willis WAN, Chun Yu | 2021-09-17

🖊 本周重點

  • iPhone 13 / Pro:無驚喜、無驚嚇
  • AI 與藝術:機器也能成為藝術家嗎?
  • VPN 能保障你免受黑客攻擊嗎?

🗞 News 1: iPhone 13 Pro:無驚喜、無驚嚇

今個星期特別難揀新聞,因為個個都望住 Apple 出新手機 🤣 Willis 唯有隨波逐流下,同同學仔一齊睇下新 iPhone 嘅規格(specification)。

(妖你自己想換 iPhone 13 Pro Max 咋嘛,全村人都知啦)

係貓。呢隻貓同「快報」有咩關係?無架。純粹我鐘意呢隻貓,而我又有 Paid Licence 可以用咁解囉。

ICT 重點

同同學仔睇下一啲你哋會識嘅 spec,當溫溫 Unit B 入面嘅電腦組織:

貯存容量:最高規格嘅 iPhone 13 Pro 版本會去到 1 TB。(我屋企部台機啱啱先 upgrade 去到 1 TB SSD + 2 TB HDD,結果俾人笑言係一隻有打出打入功能嘅移動硬碟 🤣 )

重量:新嘅 iPhone 13 Pro 會重 203 gram (Pro)/238 gram(Pro Max)。呢一點同學仔要識:係設計一部智能裝置,裝置嘅可攜帶性(Portability)會係設計時嘅重要一環,所以係揀選(例如)貯存媒介嘅時候,我哋可能會揀比較輕嘅 Option,例如係快閃記憶體(Flash Memory)。(見 2015 年 1B 卷第 3 題及 2016 年 1B 卷第 5 題)

晶片:新嘅 iPhone 13 會用 Apple 開發嘅 A15 晶片。係家用電腦入面,我哋通常會用一粒中央處理器(Central Processing Unit;CPU)嚟做運算。但係,手機一類嘅可攜帶裝置通常會用一種叫做「單晶片系統 System-on-a-chip」(SoC)嘅技術,將 CPU 、圖形處理器(Graphics Processing Unit;GPU)同其它部分整合成同一個晶片。

(呢部 iPhone 真係好悶,無乜好 Highlight。)

相關課題

  • 必修部分第 13 課:關於輔助貯存
  • 必修部分第 15 課:關於智能裝置

新聞來源/詳細閱讀

🔖 News 2: AI 與藝術:機器也能成為藝術家嗎?

呢篇文章係我係 Wired.com 睇到嘅一篇訪問。記者訪問一位作曲家 BT,佢最近用自己以前作嘅曲,將佢哋放入一個 AI 系統入面,然後要個系統生成 24 小時嘅原創音樂。BT 將呢首 24 小時嘅歌,佢叫做 GENESIS.JSON,放在係區塊鍊上面俾所有人聽。

係下面「ICT 重點」,我會講下兩點我係呢個訪問到學到/同意嘅要點。雖然呢啲要點同 ICT 唔大關係(因為 ICT 集中係一啲 Computer Science 上嘅基礎知識,而唔係點應用新嘅科技),但係我覺得呢幾點會係好好嘅例子,登你哋大學 Interview Business/Technology 個陣可以多啲例子,同 Professors 吹下水。

ICT 重點

AI 嘅應用真係好多。除咗放係商業上去做定價、Marketing 之外,仲可以放係藝術界。唔單之係音樂,文字、圖畫同影片都可以透過 AI 去改造,甚至創造。例如,依家有外國報社會用 AI 嚟寫新聞報導,或者用 AI 去 upscale/remaster 一啲舊嘅 Music Video

點解 AI 可以改到圖畫、影片呢一類嘅多媒體檔案?因為對電腦嚟識,所有嘢都係二進制數字表示嘅數據。所以,對 AI 嚟講,改呢啲數字其實唔難。

訪問入面,BT 認為我哋可以善用 AI,將音樂轉換成訓練數據。如果我哋將我哋鐘意嘅 Artists 轉成 Training Dataset,然後 Train 一個 AI 系統按個 Artist 嘅 Style 整音樂,然後就將首音樂俾翻個 Artist。咁樣,AI 就可以延續個 Artist 嘅音樂。

個訪問入面,我特別認同呢一句:「現代科技是根除中間人的方法,理應令所有人得益。」(Modern technologies… are a way to eradicate the middle man in a way that empowers everyone.)呢個亦都係我大學讀 Information Systems 嘅理由:我謙卑咁認為學識點運用科技,比學識科技本身,更有價值。

相關課題

  • 必修部分第 1 課:關於數據與資訊

新聞來源/詳細閱讀

📱 News 3: VPN 能保障你免受黑客攻擊嗎?

如果你有睇開 YouTube 嘅話,你一定會聽過有 YouTuber 叫你申請 VPN,話可以保護私隱、睇到其它國家內容,諸如此類。有無諗過,VPN 係咪真係可以保障到你免受黑客攻擊?thehackernews.com 有一篇好好嘅文章,分析咗 VPN 可以抵擋乜嘢攻擊。

ICT 重點

虛擬私有網絡(Virtual Private Network;VPN)係指將網絡連接改為經過 VPN 伺服器連接目的地,而唔再直接同目的地伺服器溝通。由於我哋唔直接同目的地伺服器溝通,互聯網服務供應商(Internet Service Provider;ISP)同其他人就無辦法知道你嘅真實嘅 IP 位址。另外,絕大部分嘅 VPN 供應商都會將所有嘅傳送加密。

咁 VPN 可以抵擋乜嘢攻擊呢?基本上,只要個攻擊係會用到你真實嘅 IP 位址,咪擋到囉。例如,一啲遠端嘅入侵,或者 DDoS一類嘅攻擊。但係,如果你會引起黑客嘅注意,令到佢大發周章咁 DDoS 你嘅話,You have bigger problems to worry about.

有啲人話,竟然 VPN 會加密,咁係咪會保障到私隱?Not really,因為依家絕大部分嘅網站同手機 Apps 都已經改為使用 HTTPS,姐係話本身已經加密咗,用唔用 VPN 無分別。

另外,嗰啲唔需要用到 IP 住址嘅攻擊手法,例如係釣魚郵件或者惡意軟件,VPN 就擋唔到。

咁係咪話 VPN 真係亳無價值呢?又唔係嘅。有唔少人會用 VPN 嚟去睇其它國家先睇到嘅電視、電影等(但係呢個用法有機會觸犯版權,即係盗版),又話姐係為咗繞過政府嘅監控或禁制等。呢啲可能係有效嘅用法,但係法律上、道義上係咪一個好嘅做法,Willis 唔敢下結論。Willis 淨係知道,如果話 VPN 可以保護到用戶上網嘅時候免受黑客攻擊,可能有誤導嘅性質。

我係底下 Link 咗英國 YouTuber Tom Scott,佢係解釋 VPN 嘅用途解釋得非常好,值得同學睇下。

相關課題

  • 必修部分第 16 課:關於虛擬私有網絡(VPN)

新聞來源/詳細閱讀

問題回顧

  1. 係設計可攜帶裝置嘅時候,我哋會留意裝置嘅乜嘢特質?
  2. 藝術界可以點樣運用 AI?
  3. VPN 可以抵擋到邊啲攻擊?

鐘意篇文嘅話,麻煩係下面個 IG Post 上面俾個 Like ❤️ 感謝感謝

更多內容