目錄
如果你仲未修讀 ICT：2022 年起，ICT 將會使用新嘅 Syllabus。如果你想知道 ICT 讀啲乜嘢，請你睇ICT 考核範圍（新制，即 2025 年或以後的 DSE）。
最近同私補同學傾計嘅時候，發現佢哋對 ICT 嘅 Syllabus 唔係好熟，近日都有中三嘅同學 DM 我關於中四揀科嘅事。趁呢個機會（亦都趁科大 Professors 未追我交 Research 之前）寫咗呢篇文，俾升中四至中六嘅同學參考下。
必修部分 Compulsory
首先，必修部分包含五個單元（括號顯示教育局建議的課時比例，而非佔分。關於佔分嘅部分，同學可以睇睇我之前IG post嘅分析）：
- 單元A：資訊處理 Information Processing（36%）
- 單元B：電腦系統基礎 Computer System Fundamentals（17%）
- 單元C：互聯網及其應用 Internet and Its Application（15%）
- 單元D：基本編寫程式概念 Basic Programming Concepts（17%）
- 單元E：資訊及通訊科技對社會的影響 Social Implications（15%）
單元A：資訊處理
呢個單元可以分做兩大部分。第一部分會主要學到「資訊系統 Information Systems」係指啲乜，包括我哋點樣定義「數據 Data」同「資訊 Information」，仲有電腦係點樣儲存同表達唔同類型嘅數據，例如係數字、文字、圖像等等。
第二部分就着重係點樣運用一啲辦公室常用嘅軟件，包括 Word、Excel、Access（Database）等等。亦都係因為要識得用呢啲軟件，所以單元A嘅課時會比較長。
單元B：電腦系統基礎
同學會係單元B學到一個電腦系統嘅兩大部分：「硬件 Hardware」同「軟件 Software」。例如，同學會學到「中央處理器 Central Processing Unit」、「隨機記憶體 Random Access Memory」同「硬碟 Hard Disk」之間嘅關係、常見嘅輸入輸出設備、「系統軟件 System Software」同「應用軟件 Application Software」嘅分別、同埋點樣區分唔同嘅電腦系統。
單元C：互聯網及其應用
單元C可以分做三大主題。首先，同學會學到數據係點樣從一部電腦通過網絡傳送到另一部電腦，途中會經過邊啲設備，同埋呢啲設備會點樣運作。第二，同學會了解到互聯網會點樣影響到現今社會，例如係電子商貿、電子學習等。呢啲網上活動背後有啲乜嘢技術去支持。第三，同學會學到編寫網頁嘅基本技巧，尤其是設計「用戶界面 User Interface」嘅時候要留意啲乜。
單元D：基本編寫程式概念
係單元D，同學會學識用「偽代碼 Pseudocode」同「流程圖 Flowchart」為問題編寫程式之外，亦會學到點樣「測試算法 Algorithm Testing」，同埋點樣比較兩個解決方案。
單元E：資訊及通訊科技對社會的影響
單元E所涉及嘅題目會比較廣泛，包括「公平存取 Equity Of Access」、健康議題等。另外，呢個單元比較深嘅題目包括「知識產權 Intellectual Property Rights」同埋「威脅與保安 Threats And Securities」。
選修部分 Electives
另外，同學會係以下四個選修單元中修讀其中一個。（大部分學校只會提供其中一個選擇，所以基本上係無得揀。中三想修讀 ICT 嘅同學可以問問同校嘅高中同學佢哋讀緊邊個選項。）
- 選修單元A：數據庫 Database
- 選修單元B：數據通訊及建網 Data Communications and Networking
- 選修單元C：多媒體製作及網站建構 Multimedia Production and Web Site Development
- 選修單元D：軟件開發 Software Development
選修單元A：數據庫
延伸必修單元A嘅內容，呢個選修單元會集中講同學可以點樣設計同實施一個「關聯式數據庫 Relational Database」。同學會識點樣運用「結構化查詢語言 Structural Query Language」去建立、修改同查詢數據庫／數據庫表。另外，同學都會學識良好數據庫設計嘅重要性，同埋數據庫對社會嘅影響。
選修單元B：數據通訊及建網
延伸必修單元C第一部分同單元E嘅內容，呢個選修單元會更深入探討數據傳輸所涉及嘅設備同「協定 Protocol」。同學亦會學識點樣架設簡單嘅電腦網絡，同埋監控網絡表現。呢個單元亦都會再次強調網絡保安嘅重要性。
值得留意嘅係，呢個單元嘅選修率，係 2020 嘅 DSE 入面跌到得翻 1%。所以選修呢個單元嘅同學，要留意坊間及網上對呢個單元嘅資源會比較少，上堂嘅時候要打醒十二分精神。
選修單元C：多媒體製作及網站建構
延伸必修單元A、C同D嘅內容，呢個選修單元會討兩個重點，包括點樣製作同運用「多媒體元素 Multimedia Elements」同點樣編寫網頁。同學亦會學到網站建構中常用嘅技術，例如係「曲奇 Cookies」、「客戶端手稿程序 Client-side Scripting」等。呢個選修單元亦有少量編寫程式嘅元素，但同必修單元D一樣，同學唔需要學識某種等定語言。
由於呢個選修單元同必修部分有較大重疊，所以呢個選修單元嘅選修率一向高企，坊間嘅資源亦會較多。
選修單元D：軟件開發
延伸必修單元D嘅內容，呢個選修單元集中係點樣編寫一個程式。一般而言，同學會係 Pascal 、 VBA、Java 同 C 中學識一種語言，並且運用這種語言編寫程式（但是近年的題目都要求同學改以偽代碼作答）。除了編寫程式外，同學亦會學到唔同嘅程式語言嘅唔同之處，同埋「傳統瀑布模型 Traditional Waterfall Model」、「應用系統迅速發展法 Rapid Application Development」等系統開發方法。
希望呢篇文章幫到你了解 ICT。有問題歡迎 IG DM 我發問！