目錄
讀 ICT 嘅都知道一個基本事實：想高分唔可以死讀書。But come on, James ，我有咁多個 Electives 要讀，點再留意 IT 啊？
Well fear no more, my friend，Willis 終於諗到點樣用佢個垃圾 Personal Website。係呢個「希望可以每星期更新但係應該好快變做不定期更新，視乎有無人請我」嘅系列𥚃面，我會收集三篇近期關於科技嘅新聞／文章，並且用最短嘅篇幅去解釋作為一個 ICT 學生，你應該要識啲乜。希望呢啲文章可以幫到你答 ICT 卷嘅問題，同埋多一兩個 Examples 係手，去大學 Interview 嘅時候可以拋下書包（親身經歷😂）
Without further ado, let’s go!
🖊 本周重點
- 東京奧運：點解會同人工智能扯上關係
- iOS 最新版本修復零日漏洞：咁但係咩叫零日漏洞？
- 以後，我哋諗搭咩車返工返學嘅時候，會先睇 Google Maps
🗞 東京奧運：點解會同人工智能扯上關係
Omega Timing 一直都為奧運提供官方計時服務。但係 Omega Timing 除咗提供更加準確嘅計時服務之外，呢間公司更加花咗四年時間開發一個人工智能（Articificial Intelligence）系統去學習沙灘排球。
呢個 AI 系統電腦視覺（Computer Vision）去追蹤球員同排球嘅位置，並且透過好多訓練數據（Training Data）去學習唔同嘅排球打法。當呢個 AI 系統夠成熟嘅時候，就可以用佢嚟為大眾提供參賽者嘅實時數據。
Omega Timing 嘅發言人表示呢個系統嘅準確率達到 99%。但係來自 Durham University 嘅教授就對系統嘅準確率有所懷疑：可能 99% 只係適用於某啲國家嘅球員，如果係喺奧運嘅場合用嘅話，個系統可能會認唔到其他球員。
ICT 重點
AI 係近年好熟門嘅題目，甚至科大、中大等大學都開咗新嘅 AI 學位課程。人工智能其實有好多應用層面，大如無人車、自動駕駛等，小如YouTube／Netflix 嘅 Recommendation System。AI 可以用嚟解決好多傳統 Programming 解決唔到嘅問題，因為現實上好多問題，唔係幾句 if statements 可以解決嘅。
係原文中，教授對呢個 AI 系統提出一個好重要嘅問題。呢種問題通常稱為 Overfitting，中文通常譯做「過適」。創造一個 AI 系統需要好大量嘅數據，呢啲數據會用嚟訓練個 AI 系統。係訓練嘅過程，AI 系統會依賴訓練數據去「估」個 result 出嚟。只要「估」得夠多，個 AI 就識得累積經驗，之後就會越「估」越準。但係，如果個 AI 淨係喺訓練嘅時候先識得準，係現實嘅數據就唔準嘅話，咁呢個 AI 就對我哋無用。AI 淨係喺訓練嘅時候先識得準，呢件事就叫做 Overfitting。所以寫完一個 AI 系統之後，第一件事就係確保 Overfitting 唔會發生，如果唔係寫呢個 AI 嘅努力就會白廢了！
相關課題
- 選修單元 A 第 12 課：關於數據開採及其應用
新聞來源／詳細閱讀
📱 iOS 最新版本修復零日漏洞：咁但係咩叫零日漏洞？
iOS 同 iPadOS 係今個月內推出咗幾個版本。係最新版本 14.7.1 入面，除咗除錯咗（debugged）以 iPhone 解鎖 iWatch Apple Watch 之外，亦都修復咗一個零日漏洞。呢個零日漏洞令黑客可以獲取成部手機嘅控制權。
ICT 重點
先講下咩叫零日漏洞。寫程式嘅時候我哋成日會有 Bug（無計，人類就係犯賤）如果呢啲 Bug 對系統嘅安全帶嚟威脅嘅話，呢啲 Bug 就會成為漏洞 （Vulnerability）。
正常嚟講，程式嘅開發團隊會一直留意自己嘅程式有無 Bug，有嘅話會盡快修復。但係，如果個 Vulnerability 係由黑客發現的話，開發團隊就無時間去修復。開發團隊得 0 日去修復，所以我哋就叫呢啲漏洞做「零日漏洞 Zero-day Vulnerability」。如果零日漏洞被大規模利用嘅話，呢個攻擊就叫做「零日攻擊 Zero-day Attack」。
所以，更新系統嘅其中一個原因，就係要修復保安漏洞，確保自己嘅系統唔會被攻擊。其實，更新操作系統／軟件有四個主要理由：
- Correction: 為了修正軟件／系統而更新
- Prevention: 為了預防未來的問題而更新
- Adaptive: 為了適應環境改變而更新，即增加系統／軟件的功能
- Perfective: 為了完善系統／軟件的功能而更新
相關課題
- 必修部分第 14 課：關於操作系統
- 必修部分第 27-28 課：關於保安漏洞
- 選修單元 D 第 22 課：關於系統維護
新聞來源／詳細閱讀
-
2018 年 1B 卷第 2（a）題
-
The 4 Types Of Software Maintenance & How They Help- CAST Software
🗺 以後，我哋諗搭咩車返工返學嘅時候，會先睇 Google Maps
Google Maps 準備加入一項新功能，令用戶可以睇到公共交通工具上面有幾多人，從而幫助用戶決定搭咩車。
Google Maps 會收集用戶嘅歷史位置數據同用戶自行提交嘅數據，去決定嗰個交通工具上面多唔多人。係紐約同悉尼，Google Maps 可以精準到講到地鐵邊個車卡最多人。
原文提到，如果唔想 Google Maps 收集過多嘅數據嘅話，可以去設定到關閉位置歷史。
ICT 重點
There ain’t no such thing as a free lunch. 係網絡嘅世界，公司唔會免費俾服務你。呢啲公司好可能係透過收集個人數據嚟獲利。雖然呢啲公司會用收集翻嚟嘅數據嚟提供好有用嘅服務，我哋係咪真係可以相信呢啲公司會正確咁處理數據呢？
你可能會話，係香港，我哋有 PD（P）O 去保障數據。但係大多數法律都只會係數據外洩咗之後先至執法（After-the-fact），先至懲罰無保護好個人數據嘅公司。咁樣算唔算有效嘅保護呢？我哋又可唔可以相信大公司會好好保障我哋嘅個人資料呢？
相關課題
- 必修部分第 28 課：關於數據私隱
新聞來源／詳細閱讀
問題回顧
睇下你仲記唔記得呢篇文章嘅內容！
- Omega Timing 點樣係奧運應用人工智能？
- 更新操作系統（Operating Systems）或者其它應用程式有邊四大理由？
- 點解公司鐘意收集數據？
鐘意篇文嘅話，麻煩係下面個 IG Post 上面俾個 Like ❤️ 感謝感謝