讀緊高中嘅你，應該有點樣嘅覺悟？
讀緊高中嘅你，有無諗過要透過 DSE 入到大學，有幾高難度？可能你係升中四嘅同學仔，啱啱先揀完科，對高中 DSE 未係好熟悉。又或者你已經升中六，已經知道自己想入邊間大學，想讀邊一科。要入到自己心儀嘅個一科，DSE 要作出幾大努力？
首先，我假設大部分同學仔都唔係想讀 Law 或者 Medic。（如果你想讀 Law 或者 Medic，但係唔知要作出幾大努力嘅話，Ummm Good Luck With That。）另外，每個同學仔都有唔同嘅興趣，無辦法一概而論。所以我哋嚟睇下一啲搶手、唔洗擔心就業嘅科目，當做一個 Proxy，睇下佢哋收幾多分。
2020 收生分數
| JS Code | Title | 最佳五科總分中位數 | 最佳六科總分中位數 |
|---|---|---|---|
| JS4214 | 環球商業學 | 38 | |
| JS4238 | 保險、金融與精算學 | 27 | |
| JS4252 | 計量金融學 | 30 | |
| JS4276 | 計量金融學及風險管理科學 | 32 | |
| JS4428 | 金融科技學 | 27 | |
| JS4468 | 人工智能：系統與科技 | 30 | |
| JS4719 | 風險管理科學 | 26 | |
| JS5315 | 工商管理學士（環球商業管理） | 37 Note 1 | |
| JS5814 | 理學士（風險管理及商業智能學） | 33 Note 1 | |
| JS6224 | 文理學士(應用人工智能) | 36 Note 2 | |
| JS6248 | 理學士(計量金融) | 38 Note 2 | |
| JS6729 | 理學士(精算學) | 32 Note 2 | |
| JS6860 | 金融學學士(資產管理及私人銀行) | 38 Note 2 | |
| JS6896 | 工商管理學學士(國際商業及環球管理) | 45 Note 2 |
Note 1: 科大嘅計分方法亦都比較複雜。表入面嘅分數係強行移除比重後嘅結果，僅作參考。
Note 2: 港大嘅比重同其它大學有啲唔同（5** = 8.5; 5* = 7, 5 = 5.5），所以會出現總分 >42 嘅情況。
屈指一算，想入到呢啲科，最低消費已經講緊 Straight 5 或者 Straight 5*。要達到呢個分數有幾困難呢？
每一年，HKEAA 都會公佈係夠 （3322）2 ／（3322）33 嘅人入面 Best 5 同 Best 6 嘅分數範圍。我將 2021 年數據抄咗出嚟俾大家參考：
2021 年 HKDSE 分數分佈
| 最佳五科總分類別 | 百分比 |
|---|---|
| 33 分或以上 | 0.7% |
| 30 分或以上 | 1.8% |
| 27 分或以上 | 3.2% |
| 24 分或以上 | 5.6% |
| 11.3% |
| 最佳六科總分類別 | 百分比 |
|---|---|
| 40 分或以上 | 0.7 |
| 37 分或以上 | 0.9 |
| 34 分或以上 | 1.7 |
| 31 分或以上 | 2.8 |
| 28 分或以上 | 4.9 |
| 11.0% |
姐係話，每年有大概 11% 嘅考生考得出至少 Straight 5 嘅成績。呢 11% 嘅考生，揸住 Straight 5 嘅成績，基本上除咗部分「神科」之外，其它科都會照收。亦即係話，考到 Straight 5 嘅話，你基本上穩入自己有興趣嘅科。
咁係咪即係話，高中 Aim 住 Straight 5 就得呢？
對絕大多數考生嚟講，DSE 係一飛子彈——無人會想考兩次 DSE 先入到大學。一位狙擊手如果得一飛子彈嘅話，佢嘅心理質素一定要好，先至可以確保粒子彈射得準。應考 DSE 嘅同學仔，老實講，得十幾歲，係咪真係可以咁老定？係咪真係可以確保自己上到戰場唔會失手？萬一考完 DSE，出到嚟嘅分數俾預期低 10-20%，你仲可唔可以確保到自己入到心儀嘅科目？Aim Straight 5 係咪真係得？
可能你諗住入啲普通嘅科，好似 Willis 咁純粹鐘意科技，所以入咗收分唔算高嘅 HKUST BBA（IS）。如果個科收分唔高嘅話，Aim Straight 5 可能已經足夠。你可以唔同意我嘅分析，但係我謙卑咁認為：我哋可以接受平凡，但絕不能甘於平庸。
想係 DSE 呢個遊戲到搵到 Good End，就一定要有想進步嘅心態，同埋適合自己嘅讀書模式。要記得，每十個考生入面，得一個考生會攞到 Straight 5。
