「同枱食飯,各自修行。」

Willis WAN, Chun Yu | 2021-11-08

「同枱食飯,各自修行。」

我班主任好鐘意呢句說話,間唔中就會對住我哋講。因為我哋中學唔俾我哋出街食飯(因為我讀將軍澳半山名校),日日放飯就同幾個 Friends 坐係 Canteen 到食飯。我哋幾個都諗住讀唔同嘅系,但係都會吹下水:學業、愛情、老師、同學,無話不談。當時嘅我會覺得,既然學習係自己嘅事,我同班 Friends 嘅目標又唔同,咁睇落「同枱食飯,各自修行」呢句,唔錯得去邊。

但係大個咗先發覺,可以「同枱食飯」係有幾珍貴。

大個咗先發現,可以同班 Friends 訴下苦,可以係 Canteen 暢所欲言,一時講下邊個同邊個拍拖、邊個邊個教書好悶、邊個邊個阻住地球轉。雖然都係講笑咁講笑,大家都會呢到講呢到散,但係正正係呢啲唔經修飾嘅交談,令到我嘅中學生涯,添加咗唔少顏色。

大學畢業之後,回想翻中學嘅事,第一件事唔係自己為 DSE 有幾拼命,亦唔係自己嘅成績。反而係有幾多個晏晝同班兄弟一齊食飯,又有幾多個放學同班兄弟一齊匿埋係 DT 室嘅材料房吹住水。係,我哋嘅想讀嘅系唔同,但係呢班戰友係 DSE 途中俾咗唔少嘅鼓勵我。

大概我哋算係「同枱食飯,互相扶持」掛?

同你嘅戰友講一聲「加油」啦!HKDSE 呢一場仗,唔需要一個人打。

更多內容