執筆期間，你哋應該仲係努力緊係 Paper 1 之上。
回想上年嘅呢段時間，我都作為一個自修生，努力係自己嘅試卷之上。相隔咗六年，再次係 ICT 卷上奮筆疾書，為嘅只係想由一粒星升做兩粒星，彌補翻當年嘅遺憾。另一方面，一個想促進 ICT 發展嘅人，係 ICT 呢一科攞唔到 5**，講唔過去啊。我仲好記得，上年考完 ICT，下午同同學仔討論完 MC 同 SQ 答案，第二日又要走去拍精讀班 😂 攰到核爆。
一年原來咁快就過。係呢一年，雖然 Willis 無係前線到同你哋一齊考，但係就多咗好多時間去製作好多內容——唔同嘅課程、IG Posts、YouTube 片、練習、考試等等。單單係 Instagram，過去一年就有 45 個 posts，當中有啲資源就超過 200 頁係比同學仔免費下載。仲有，我哋今年第一次有一個免費嘅 ICT 模擬考試，所有有心讀 ICT 嘅同學仔都有得報考。無同學仔嘅支持，呢一齊嘅資源都會係毫無意義。
係到特別想感謝 @2021_yuraemoe @bee_wlf0318 同 @dse.directory 三個 🙏 由我一開始同你哋 Pitch 免費模擬考試呢個 Idea，你哋無問過太多 Detail就拍心口同我搞。入面嘅問題質素之高，同學仔有目共睹。好感激你哋，無咗你哋嘅話，我自己一個係無可能搞一個咁大規模，有近 400 個同學仔報名參加嘅免費模擬考試。對唔住你哋嘅係：你哋值得更多嘅 attention，我應該更加強調呢個唔係 Willis 嘅模擬考試，而係我哋幾個嘅成果。希望下一年，我哋可以做得更好，搞一個更加好嘅模擬考試。
另外，好感激所有加入咗 Telegram 同 Discord 嘅同學仔。上年，Telegram 有好多問題都係我親身答，但係今年就多咗好多同學仔或者有心人士幫手，好感激你哋。特別想多謝 Discord 上面語音頻道嘅各位，令到成個 Discord Channel 生色不少。請繼續幫我鼓勵中四五的同學仔。
回望呢一年，問心個句，Willis 覺得自己做得未夠好：100 分嘅話，頂盡 75。每一次答問題唔夠精煉，每一堂講得太悶唔夠清晰，其實我都知道，我都有反思。可惜今年，時間係我最大嘅敵人。太多工作嘅時間，太少思考嘅時間。係到感激同學們的包容，耐心等候 Willis 進步。
好感激今年遇到的每一個你。可能你唔再需要讀 ICT，但係希望你記得我哋所學過嘅思考方法，同埋保持對科技嘅熱誠。亦都希望你記得，你曾經為一個目標奮鬥過，當中嘅汗水、淚水並非毫無意義。
考完之後，謹記好好休息，我哋互聯網上再會。
Willis, 11 May 2023