ICT 學生應唔應該背 Marking Scheme?


Willis WAN, Chun Yu

Posted 13 September 2022

HKDSE

HKDSE ICT

ICT

Introduction

Follow 咗我一段時間嘅同學仔都知我哋逢星期一都會係 IG Story 開放 Q&A,問書好吹水好,當交流下。尋日 Willis 收到一條問題,我覺得好值得分開一個 Post 嚟回應。條問題係咁嘅:「點睇背 marking scheme 呢樣野」。

睇到呢條題目嘅時候,感覺上其實好唔舒服——因為我知一方面 ICT 學生唔應該死背 Marking Scheme,但係由於種種原因 ICT 學生有背 Marking Scheme 嘅需要。我想係呢個 post 同大家分析下。

TLDR

請原諒 Willis 可能會叫你背某啲題目嘅 Marking Scheme,但係絕大部分題目應該以理解為主軸。考評局的出卷員應該在設立考卷時多從考生的角度出發,確保題目的每個字眼都準確反映出所預期的要求,唔好要考生「估估下」。

點解 ICT 唔應該係死背 Marking Scheme

由 12 年到 22 年,HKDSE ICT 嘅考試已經舉辦咗 11 屆。同學仔有無諗過,其實 ICT 呢一科想你成為一個點樣嘅人?根據教育局嘅 ICT《課程及評估指引》,ICT 呢一科嘅宗旨有 4 點,包括

如果仔細啲睇,特別係第 1 同第 2 點,你會發覺教育局根本無 expect 過同學仔背書。只要你係 ICT 堂,學好啲基本 concepts ,學好點樣應用,亦學好點樣去表達你嘅答案,你就會搞掂 ICT 呢一科。

宗旨寫就咁寫姐,但係作為一個學生,我哋 care 嘅係,ICT 呢一科我點先可以拎到 5**,同 ICT 點樣幫到我入大學。所以,我哋會睇下 ICT 考核模式嘅種種特色點樣鼓勵咗同學仔背書。

點解 ICT 嘅考核模式鼓勵同學背 Marking

有睇過我網站嘅同學應該都知 ICT 嘅考核模式其實分做 2 parts:一部分叫校本評核(SBA),另一部分叫公開考試。

先講下 SBA。近幾年疫情嘅關係導致面授課時嘅縮短,SBA 先後被取消,所以可能好多同學仔唔清楚 SBA 嘅玩法。等 Willis 好快介紹下 SBA 嘅玩法。簡單啲嚟講,你日校嘅 ICT 老師會係中五下學期同中六上學期比一個特別嘅「功課」你,你做完就交翻俾你嘅 ICT 老師,佢會比個分數你,2 份功課同佢嘅分數會交俾考評局作分數調整。最終嘅得分會佔你 DSE ICT 呢科嘅 20%。呢到衍生咗幾個問題:(1) 作為學生,我點知道我做緊「功課」會係咩嘢形式?係咪足夠難,可以反映到我實力?(2) 考評局點睇我老師俾我嘅分數同 comment ,會否過鬆或過緊,導致分數對我有不利嘅調整?(3) SBA 嘅分數會按同校 ICT 同學公開考試嘅分數作調整。雖然考評局聲稱分數調整會使整體的分布公平,但作為考生呢個調整對我的分數是有利的調整?呢幾個問題令到 SBA 變得非常複雜,當中摻雜作太多人嘅因素。以呢啲人為因素哪怕係影響整體分數嘅 1% 已經可以係 5* 同 5** 嘅分別。所以,ICT 嘅同學仔只能夠係靠公開考試呢一種相對公平的評核方式下盡力搶分。

去到公開考試,好多無讀過 ICT 嘅同學仔會覺得呢科會好似數學咁,一定會有啲癲佬會滿分,所有題目都好客觀有標準答案。其實有操過卷嘅同學仔都知:唔一定架。好多時我哋寫咗個答案,自信滿滿,但係個 Marker 仲會搵到理由唔比分。例如一啲 advantages/disadvantages 嘅題目,同學仔其實已經寫到個重點出嚟,但係由於當年個 marking 比較緊嘅時候,同學仔個答案就變咗無分。好多時,呢度所謂嘅 marking 較緊,其實係條題目度係完全反映唔出嚟。

舉個例子:2021 年 1B 卷其中一條分題要同學答一個防火牆點樣保障網絡服務嘅安全。防火牆嘅作用我相信大部分 Lv4+ 嘅同學仔都答到,但係當年嘅 marking 卻要同學寫出通訊中嘅對像,先至會比足 2 分。題目又無講要指名道姓,我作為考生緊係以為你指緊情景入面嘅嗰個通訊架啦,點會估到你要我抄翻題目個 scenario 姐?如果題目有要求無做到,呢個責任係考生到。但係依家題目無講到,又算唔算得上公平呢?

題目上嘅唔清晰導致同學失分,每年都有啲咁嘅例子。而且公開考試佔分咁重,同學仔想執得一分得一分,實屬無可厚非。所以面對呢啲「讀心」題目,同學仔就只有見一題背一題,然後祈求下年少啲讀心題,唔好因為呢種題目導致自己跌一個 Grade 。

總結

當社會每個人都講緊 STEM 甚至 STEAM 嘅時候,同時又對 ICT 嘅同學仔面對嘅困難視若無睹,甚為諷刺。有啲人話 ICT 少人讀係因為教嘅野太 outdated ,Willis 覺得只啱一半。另一半係,ICT 不論係教學範圍同考核模式都非常模糊,令學生、老師難以適從。考卷裏出現 IoT 、chatbot 、AI 等考核範圍內無提及的課題屢見不鮮,課程指引亦未清楚說明哪些技術需要教,哪些不需要教(例如是哪些檔案格式是常見的,同學們需要學習,指引是沒有作說明的)。

所以,同學們,請原諒 Willis 或會叫你們背特定題目的 marking scheme,because my hands are tied。但係,Willis 認為絕大部分的題目同學不應背誦,而是應該理解每個概念及概念背後的理由。畢竟,要背 200 多個概念的標準答案,是不切實際的。

2025 年的 DSE 將會迎嚟 ICT 考核上的一大改變。希望考評局的出卷員在設立考卷時能多從考生的角度出發,確保題目的每個字眼都準確反映出所預期的要求,唔好要考生「估估下」。咁樣先係對所有讀 ICT 的青年最好,亦係對香港 STEM 發展嘅最好方法。

更多內容

About the Author

Willis WAN, Chun Yu

A graduate in BBA(Information Systems) of HKUST. Tech Enthusiast, Teacher, Learner.

Copyright © 2021 All Rights Reserved